Mic少：飛腳速戰速決

FC城南踢風流波
亞冠盃最後一輪分組賽，F組競爭非常激烈，FC城南已獲出線權，餘下一席成為大阪飛腳同武里南聯之爭，現時兩隊同分，飛腳對賽成績佔優，所以只要今日主場擊敗FC城南，就可以進身十六強。大阪飛腳勢必先下手為強，爭取盡快打開紀錄，既可為出線奠定基礎，同時又可打沉另一場武里南聯嘅士氣，揀1.95倍飛腳半場主勝。

（now 671周三晚6時15分直播）

其實以大阪飛腳嘅級數早應獲得出線資格，但因開局差，首三場分組賽只得一分，搞到依家仲要搏命。不過呢支日職勁旅狀態已回勇，近兩場亞冠盃全勝共轟入七球，如果計埋聯賽更一度連贏八仗，直至上場先至輸畀浦和紅鑽，而該仗飛腳明顯有保留，目的好明顯就係要全力贏今場亞冠盃關鍵大戰。

盡快奠勝打擊武里南聯
值得留意，由於同組兩場比賽同時間開波，如果飛腳可以一早領先，自然會影響另一場武里南聯球員嘅爭勝鬥心，事關一旦飛腳贏波，武里南聯即使喺主場擊敗已出局嘅廣州RF，亦無法晉級；因此飛腳應會力爭先開紀錄，心理上「隔空」打擊武里南聯。飛腳射手宇佐美貴史腳風非常順，近六場比賽射入五球，有足夠能力上半場攻陷FC城南大門。

南韓球隊FC城南已肯定出線，冇必要同飛腳硬碰，否則一旦搞到主力受傷就得不償失，今仗甚至派副選出擊亦唔奇。後衞尹英善停賽，亦令佢哋防線出現隱憂，作客更難抵擋飛腳強襲。　

上屆亞冠盃盟主西悉尼流浪者昨晚於H組雖以2比0作客擊敗賽前已經篤定出線嘅FC廣州（廣州恒大淘寶），可惜同組FC首爾憑補時入波以3比2絕殺鹿島鹿角，西悉尼流浪者以1分屈居FC首爾之後僅列小組第三，宣布衞冕失敗。另外G組FC北京和水原藍翼亦順利躋身16強。