Mic少：墨爾本打吡撐勝利

以逸待勞等攻「城」
澳職季後賽4強戰上演「墨爾本打吡」，墨爾本勝利主場對墨爾本城，勝利係常規賽冠軍，實力已勝一籌，加上可以直入4強，球隊以逸待勞，備戰時間及體力方面都佔優。墨爾本城踢多1場季後賽，並連續4場作客，飽受舟車勞頓之苦，睇低一線。墨爾本勝利小讓平半，上盤抵玩。

（有線64及203台周五下午5時30分）

墨爾本勝利季尾愈戰愈勇，近6場贏5場，最終成為常規賽一哥，呢支07及09年總冠軍，最犀利係一對前鋒貝利沙及艾奇湯臣，兩人今季共轟入23球，中場古希美亦有7球進帳，勝利進攻瓣數多，令對手難以招架。勝利另一大優勢係可以直入季後賽4強，球隊有近兩星期時間備戰及休息，今仗猛虎出柙，氣勢更旺盛。

墨爾本城「4連客」攰死
墨爾本城常規賽僅第5位，因此需要踢多1輪季後賽，雖然作客2比0淘汰威靈頓鳳凰，但遠赴新西蘭比賽，難免舟車勞頓，加上最後兩場常規賽亦係作客，換言之，今場係墨爾本城直落第4場作客比賽，四出奔波，遊飛機河都遊到頭暈。

今場季後賽以一戰定生死，如果90分鐘打和就會加時，再和以互射12碼分勝負。以墨爾本勝利近4次主場墨爾本城，取得3勝1和嘅佳績，應可以90分鐘內解決對手。