九叔：日本唔衰得「讓和」克敵

新帥order嚟緊兩場要贏晒
「未來兩場波都要贏！」講呢句說話嘅係日本主帥夏利荷錫，新波士講得咁清楚，日本班球星又點敢勒住，今晚佢哋响橫濱友賽伊拉克，主勝賠率咁奀，博3.65倍讓球和好過。（有線61、201周四晚6:00直播）

除咗今晚同伊拉克拍跳，日本喺下星期二仲會轉戰埼玉對新加坡，踢世界盃亞洲區外圍賽E組開鑼戰。從實力嚟講，日本下星期贏硬「星洲」，反而今日對伊拉克仲難打啲，能唔能夠滿足夏利荷錫嘅兩連勝要求，今晚場波重要啲。

寸舊帥狂谷死球戰術
但係今場畢竟係友誼波，日本、伊拉克下禮拜仲有世盃外要應付，今場本來冇乜必要打真軍，只求班人冇穿冇爛就OK嘞。不過，夏利荷錫新官上場，點都要做啲嘢話畀人知佢好掂，好似佢早幾日練波嗰陣，就批評日本一直以嚟唔識靠自由球入波，但又狂谷死球戰術，佢咁講即係批評日本啲前任主帥啫，咁大口氣，呢場波自不然唔衰得，「藍武士」贏唔到波，夏利荷錫真係殺人都似。

近3戰日本

伊拉克僅輸1粒
其實伊拉克班波唔差，可惜國內戰亂不絕，妨礙咗佢哋嘅水準提升，所以近15年嚟，佢哋5戰日本都輸晒，但當中近3場伊拉克只輸0:1，剩低係0:2同1:4各一場。顯而易見，日本今場即使有齊香川真司、本田圭佑、岡崎慎司、武藤嘉紀、清武弘嗣一大班勁嘢，前日又補選咗永井謙佑頂替大髀傷咗嘅川又堅基，陣容夠鼎盛，都未必炒起伊拉克，既然主勝得1.17倍，博讓球和仲好分。