史雲斯再造“馬”

史雲斯再造“馬”

既然今日冇乜重點賽事，轉一轉口味，介紹場歐霸盃外圍賽第三圈次回合比賽，因為有英超球隊出戰，史雲斯作客馬模。首回合馬模作客慘吞史雲斯四蛋，今仗要翻身根本難過登天，與其妙想天開，不如自己彈開，留力在聯賽搏殺爭標。

英超中游班之中，史雲斯係小弟最欣賞一隊，經過勞特立調教後，整體踢法變得更加幼細，確非一般英式球隊打法。球隊今季招兵買馬，實力比上季大幅提升，可能成為今季英超黑馬分子。首回合已經高低立見，馬模確係手下敗將，今仗初盤史雲斯小讓平手／半球，捧史雲斯再度斬“馬”。

馬模屬於瑞典傳統勁旅，目前在聯賽排前三甲，與榜首希爾星堡只有兩分差，仍大有爭標機會；最重要過兩日主場迎戰同分齊排第二位的AlK蘇納，呢場大戰不容有失。所以今晚一戰應放棄居多。

史雲斯今季認真重本，以破球會最高轉會費一千二百萬英鎊，買入上季荷甲神射手邦尼，首回合已踢出身價，個人梅開二度；又從西甲貝迪斯簽入簡拿斯與普素路，加埋由利物浦過檔舒爾維，史雲斯今季應有發圍。

推介：史雲斯2：1