日聯:勝利船難擋強鋒

勝利船難擋強鋒主場戰績堅曳今晚日職上演話題之戰，神戶勝利船主場火併1哥川崎前鋒。勝利船雖有恩尼斯達及戴恩費斯杜格拉斯等球星壓陣，不過主場戰績奇差，遇上上輪意外輸波，急欲重返勝軌嘅川崎前鋒，相信難逃輸波厄運，捧客勝。（有線661及601台周三晚6時直播）勝利船有恩尼斯達等球星擔大旗，星味冠絕日職，可惜一直畀人「雷聲大、雨點小」感覺，喺講求穩定性嘅聯賽，飄忽演出令佢哋未能更進一步。勝利船上輪作客以2比1贏浦和紅鑽，但恩尼斯達同酒井高德有輕傷，今場或要負傷上陣，加上佢哋主場演出奇差，今季聯賽6次主場出擊僅獲4分，單計近5仗主場錄得4負，完全唔合格，難怪依家只能位列中游。川崎前鋒急欲求反彈榜首嘅川崎前鋒早前狀態巔峰，復賽後12場比賽豪取11勝1和，可惜上輪作客以0比1不敵名古屋鯨魚，首嘗輸波滋味，今場必定打醒十二分精神。佢哋一對前線拍檔小林悠及李安度達美奧腳風奇順，當中小林悠聯賽所入嘅7球波，有6球來自作客賽事，堪稱最強「刺客」。既然川崎前鋒開季後6場聯賽作客5勝，加上近兩次聯賽造訪神戶均贏波而回，今場一於撐客軍贏波反彈。