西甲:老將慳住踢！皇馬細破華拉度列

老將慳住踢！皇馬細破華拉度列西甲今晚開快車，衞冕嘅皇家馬德里喺馬德里迪史提芬奴球場迎戰華拉度列。皇馬唔少主力已年過30，「紅褲子」出身嘅教練施丹，深明連場征戰對球員體力要求甚巨，故應付「快車期」甚少大炒對手，加上近5次聯賽鬥華拉度列4次開2球或以下，推介2.5球入球細。（Now632周四凌晨3時30分直播）幾位球星年過3張皇馬上場西甲靠爭議性12碼，先以3比2作客反勝貝迪斯，呢3分攞得都算辛苦，最大鑊係一班主力個個年紀有番咁上下，賓施馬32歲、卻奧斯30歲、莫迪歷35歲、沙治奧拉莫斯34歲、馬些路32歲，雖然施丹積極尋找接班人，陣式上希望以老帶嫩，但骨幹成員仍然非常重要，所以肯定會錫住用。以上季為例，西甲喺疫情前踢過5次西甲快車，當中皇馬有3場總入球開2球或以下。至於停擺後重開，賽程編排緊密，個幾月內要踢11場，皇馬喺中段就連開5口入球細，3場「煲魚生粥」僅贏1比0，2場贏2比0，而且上場開火狂攻貝迪斯幾乎出事，施丹汲取教訓，預計今場都係先做好防守，不失球下小勝對手全取3分穩陣。華拉度列開季3戰2和1負，只係入過2球，鋒力有限，相信好難攻破皇馬防線，必定死守搶分。另邊廂以施丹留放有道戰術，相信會要求球員保留體力，目標為本。過去華拉度列對住皇馬都積極頑抗，近5次交手有4次總入球少於3球，睇嚟今場入波都唔會多，捧2.5球入球細最明智。