意甲:國米強攻入球騷

國米強攻入球騷賓尼雲圖主場大考驗意甲今晚有3場比賽，其中1場焦點戰賓尼雲圖主場迎戰國際米蘭。兩軍實力懸殊，賓尼雲圖只係新升班球隊，戰力欠奉；國米係上季亞軍，面對弱旅可以放心全力搶攻，但考慮國米防線並唔穩陣，最好捧中位數3.5球嘅入球大。（myTVGold301、Now638、有線654及614台周四凌晨零時直播）意盃交鋒國米贏6比2賓尼雲圖上次參戰意甲係2017/18球季，該季賓尼雲圖38場聯賽最終僅6勝，排包尾降班。賓尼雲圖上年6月聘請ＡＣ米蘭名宿恩沙基執教，成績即有改善，以上季意乙冠軍身份重返意甲。不過，賓尼雲圖財力有限，未能簽入具級數新兵提升實力，只以乙組班底為骨幹，上場作客雖以3比2爆冷戰勝森多利亞，但對手防線演出極差達到「災難級」，難與經驗及戰力俱備嘅國米作比較。至於由名帥干地領軍嘅國際米蘭，上季僅以1分之微屈居祖雲達斯之下，今季捲土重來，除保留射手盧卡古、拿達路馬天尼斯等球星外，會方今夏亦收購咗著名後衞阿舒拉夫、高拉洛夫，加上早前簽入巴塞中場維達爾，前中後3線實力均有所提升，首戰面對費倫天拿，戰至比賽末段反勝對手4比3，鋒力強大之餘鬥心亦足，值得信賴。國米近3次對賓尼雲圖獲得全勝，其中2次贏2球或以上，包括上年1月意盃以6比2大勝對手，今場不難再次大勝，但考慮到國米近2場正式賽事，合共失咗6球，捧入球大更划算。