英超:李斯特城主場翻嗒維拉

李斯特城主場翻嗒維拉今晚英超尾場，「狐狸」李斯特城喺主場硬撼阿士東維拉。雖然維拉上仗聯賽爆大冷狂數利物浦，但呢種神奇表現可一不可再，亦令李斯特城有所警惕，加上主場出擊專剋維拉，主勝有計。（Now621周一凌晨2時15分直播）維拉開咧後聯賽3戰全勝，上輪更喺主場7比2大破衞冕嘅利物浦，令人驚喜，不過呢場大勝，確實有太多偶然因素。查實維拉表現飄忽，開鑼戰對錫菲聯有80分鐘時間多踢1人下，最後只能小勝1粒，英聯盃亦喺主場畀史篤城踢出局，與陣容變動頗大，仍需要更多時間磨合適應有關。「狐狸」大把前鋒可用李斯特城上季痛失歐聯資格，今季保留大部分主力班底再戰，開季聯賽4場贏3場，包括作客5比2大破曼城，雖然上季金靴獎得主占美華迪有傷在身，今仗未必出得，但仲有艾約斯佩雷斯同伊恩拿祖可用，早前再重金簽入法國年輕中堅韋斯利科芬拿，就算蘇恩古缺陣亦影響不大。而且「狐狸」主場堅旺，近3次聯賽地頭對維拉贏晒，明顯格食格，今仗可藉地利贏波反彈。