女歐國：爭標熱門狹路相逢 法國有霸氣遇強大德起_東方日報

女子歐國盃8強大戰，兩支爭標熱門法國女足同德國女足正面交鋒。法國女足今屆大熟大勇，分組賽全勝壓倒衞冕嘅英格蘭女足首名出線，表現極具說服力。德國女足係大賽專家，前線入球能力亦好有保證，今場駁火味道極濃，博3.5球入球大係明智之選。

（HOY TV 76台周日凌晨3時直播）文:工廠仔

法國女足火力強大，3場分組賽攻入11球，而且入波由9個唔同球員取得，可見球隊進攻板斧豐富多元化，對手根本防不勝防。而且法國擅長強攻，上仗就喺半場落後嘅劣勢下，施展猛攻反勝荷蘭女足5比2，唔怕失球嘅搶攻踢法，令法國女足經常出現大手交易賽果，佢哋近5場賽事，就有4場總入球達到5球或以上，超強火力大有睇頭。

德女後防真空焗攻
另邊廂，德國女足表現不穩，問題出現喺後防方面，隊長姬莉亞古雲重傷緣盡今屆賽事，代替佢嘅嘉洛達溫莎又喺上場食紅牌，今仗要坐波監，令右路防守出現真空。德國女足上場1比4慘敗瑞典女足腳下，防守漏洞一時三刻難以彌補，今場實行以攻代守，同法國女足鬥攻，開3.5球入球大機會高唱入雲。