世盃外：主將爆傷患變陣出擊 英軍鬥安道爾借細練兵_東方日報

今晚繼續上演世界盃外圍賽，歐洲區K組英格蘭主場迎戰安道爾，論整體人腳實力，3戰3勝嘅英格蘭無疑佔盡上風，但「三獅兵團」有多位進攻主將因傷落選，領隊杜曹或會趁今次機會試陣練兵，未必會大勝安道爾。參考英格蘭近4場總入球全開4球或以下，寧願博中位數4.5球嘅入球細。（周日凌晨零時開賽）文:Mic少

英格蘭「黃金中場線」爆發傷兵潮，祖迪比寧咸今夏接受肩膀手術，需要缺陣一段長時間。高爾彭馬同布卡約沙卡不幸喺英超開季後受傷，並冇入選今次大軍名單。主帥杜曹首次揀選諾定咸森林22歲中場艾利諾安達臣，以備不時之需，AC米蘭中場羅夫度斯卓克闊別7年，再次獲徵召，可見杜曹希望盡量考察一眾邊緣國腳表現。此外，皇家馬德里右翼衞阿歷山大阿諾特因為狀態欠佳落選，難免削弱「三獅兵團」側擊力。

杜曹領軍戰術保守
事實上，杜曹今年1月正式執教英格蘭，領軍踢4場比賽取得3勝1負，3場勝仗都係來自世盃外，包括作客小勝安道爾1比0，主場對阿爾巴尼亞、拉脫維亞，分別贏2比0及3比0，可見戰術甚為保守。

至於安道爾喺世盃外4戰全敗，兼且冇入波，質素明顯低幾班，安道爾自知實力不及對手，相信會重演6月世盃外主場對英格蘭一役，以「泊大巴」戰術死守頑抗，結果該仗安道爾踢到下半場先至失守輸0比1，證明佢哋嘅防線有能力抵擋傳統勁旅狂攻，預計今仗喺輸少當贏情況之下，4.5球嘅入球細值得一試。