世盃外：最強炮台瞄準烏克蘭 法國狂鋒搶攻大解放_東方日報

今晚世界盃歐洲區外圍賽D組首輪，上屆亞軍法國第一擊，於波蘭中立場火併烏克蘭。法國主帥迪甘斯希望擺脫保守標籤，想試出最佳攻擊陣容，烏克蘭喺主帥列布夫帶領下，一向進攻大過天，鬥攻格局實多波入，2.5球入球大咪錯過。

（周六凌晨2時45分開賽）文:法達斯維

法國主帥迪甘斯早前已宣布，明夏合約到期便會離任，結束14年執教「高盧雞」生涯，佢協助球隊喺近兩屆世盃分別奪冠及亞軍，必定想喺下年世盃再創佳績，但首要條件梗係要「入到閘」先。不過佢近年過分保守嘅打法為人詬病，既然坐擁基利安麥巴比、奧士文尼迪比利、米高奧利斯、馬古斯杜林及艾基迪基等星級前鋒，無謂暴殄天物，迪帥希望藉外圍賽試出最銳利嘅進攻組合。

烏軍嗜攻入得失得
作為烏克蘭名宿，曾與舒夫真高雙劍合璧嘅列布夫，自2023年接手烏克蘭後，領軍26場獲12勝7和7負，並曾殺入2024年歐國盃決賽周，喺E組4隊同得4分下包尾出局，雖敗不辱。由於列布夫係前鋒出身，因此偏重進攻，各項賽事近5場只獲3勝2負，不過攻入9球及場場有失波，全開3球或以上，可見其踢法有前冇後，為爭取自2006年再闖世盃決賽周，唔會死守，今場屬鬥攻格局，入球大乃不二之選。