沙特職：谷起狀態追打落水狗 艾科魯特上盤德米_東方日報

今晚東網免費直播沙特職焦點戰，艾利雅德主場硬撼艾科魯特。兩軍近況各走極端，艾利雅德輸多贏少，見到都唔開胃，相反艾科魯特各項賽事4連捷，弗到漏油，寧買當頭起，讓平半上盤抵玩。

（on.cc東網周四晚10時55分直播）文:法達斯維

艾利雅德本身實力平庸，上季只係排第11位，點知嚟到今季成績仲衰，依家只能喺聯賽下游掙扎，跨季近8場聯賽只得1勝7負，單計今季頭5輪就4度落敗，兼且狂失14粒，表現猶如不設防。艾利雅德唯一勝仗係擊敗任人魚肉嘅包尾大幡艾拿積馬，整體發揮差強人意，雖然陣中都有唔少來自海外嘅球員坐鎮，包括法國前鋒泰迪奧古，以及伊拉克中場伊巴謙比耶殊，但球員默契配合仍有待改善，今仗就算有主場之利，亦不宜高估。

中型班火力唔簡單
相反，艾科魯特經歷頭2輪聯賽連敗之後，一班球員知恥近乎勇，連同盃賽在內，近4仗贏晒兼狂入11球，單計客場亦錄得2連勝，信心返晒嚟。阿根廷箭頭羅美路安歷基呢4仗場場有士哥，腳風順到冇朋友，拍住曾喺法甲同德甲搵食嘅前鋒馬奧利達，等閒後衞要阻佢哋都唔易。仲有一位球員值得留意，就係來自英格蘭嘅約翰畢奇利，呢位中場球員遠射有一手，其中喺9月中主場對達馬克FC一役，佢就喺禁區頂射入一個「碧咸式」罰球，個波彎向死角擦楣底入網，帶領艾科魯特該仗贏2比1。查實呢類中型班都係打道氣，趁住艾科魯特依家氣勢如虹，今場作客都未驚過，上盤值得捧場。