巴西盃：保地花高華斯高細均力敵_東方日報

聽朝巴西盃8強次回合焦點戰，保地花高返主場再鬥華斯高。首回合各一言和，大家都未佔甜頭，加上近年碰頭例少交收，預計唔敢輕舉妄動，會睇定先撳掣，2.5球入球細有計。

（周五早上8時30分開賽）文:法達斯維

雖然保地花高喺首回合早早領先，但好快就畀華斯高追和，而且仲有前鋒基斯杜化拉莫斯同左閘阿歷斯迪利斯傷出，最終打成1比1，客場唔輸都算執番身彩。保地花高喺今屆巴西盃都係穩打穩紮，佢哋踢咗5場有4次開2球或以下，其中3場保持清白之身，何況基斯杜化拉莫斯同阿歷斯迪利斯今仗上陣成疑，應該會先求穩。

另邊廂，喺聯賽徘徊下游嘅華斯高，實力當然唔及前列分子保地花高，不過兩回合計淘汰賽變數多，單從首回合可見，華斯高就算先失波，形勢上明顯佔盡上風，甚至有機會反敗為勝，結果贏唔到就有如放虎歸山，如今主客互調，佢哋亦唔敢冒進。

近年對壘入球偏少
翻查紀錄，雙方近5次正面交鋒，保地花高錄得2勝2和1負，只係略勝一籌，其中4次總入球都係1球起、兩球止，既然首回合打和，大家冇着數亦冇蝕底，預計今仗會小心翼翼，捧入球細更划算。