歐聯：阿仙奴未回氣半細值追_東方日報

歐聯焦點戰，阿仙奴主場硬撼奧林比亞高斯。雖然阿仙奴實力明顯高啲，但啱啱聯賽激戰一場未回氣，相信初段會以試探為主，睇定先食，奧林比亞高斯作客更加唔敢亂攻，1.5球半場細熱得有道理。（Now 639周四凌晨3時直播）文:法達斯維

論人腳阿仙奴當然被睇高一線，不過佢哋日前聯賽作客紐卡素，大部分時間落後劣勢下，靠米基爾馬連奴同加比爾馬加希斯喺末段各建一功，奇迹反勝2比1，的確好熱血，但亦消耗好多心力同體力，而且球季漫漫長路，更需要識得留放，佢哋上仗搏到咁盡，今仗唔會一開波就搶。

除此之外，阿仙奴有狀態大勇嘅馬度基因傷倦勤，啱啱好番嘅布卡約沙卡亦未弗，側擊力點都打折扣，加上喺主帥阿迪達麾下穩陣至上，今季失球數字偏低。「達Sir」呢種穩中求勝嘅策略，喺歐聯尤其明顯，連同上屆在內，佢哋近5場歐聯，上半場只失2球，半場總入球全開1球或以下，包括今屆首輪以2比0擊敗畢爾包，都係初段先求不失，下半場先發力連入2粒，可見一斑。

奧林比亞高斯唔敢亂攻
另邊廂，希臘班霸奧林比亞高斯唔單止實力差幾條街，於今屆首輪以眾凌寡，全場佔盡上風之下，仍被歐聯新丁帕福斯悶和0比0，表現令人失望，今仗作客更加唔敢輕舉妄動。最重要係阿仙奴板櫈深度充足，初段同你鬥磨玩消耗戰，易邊後再換入加比爾馬天尼利及李安度杜沙特等後備殺手，隨時殺你一個措手不及，因此上半場隨時悶鬥悶，半場細有計。