歐霸盃：維拉穩陣波細盤嗒得諾_東方日報

周五凌晨歐霸盃激戰連場，英超球隊阿士東維拉將會作客荷甲勁旅嘅飛燕諾，兩隊上屆都喺歐聯打入淘汰賽，不過季初表現齊齊跌watt，尤其係進攻火力比起上季弱咗好多，今場相信兩軍會大踢穩陣波，博中位數2.5球入球細係最佳選擇。（Now 643周五凌晨3時直播）文:工廠仔

飛燕諾由傳奇前鋒尹佩斯執教，不過踢法上反而更着重防守，進攻創造力大不如前，歐聯首輪作客布拉加就輸咗0比1。

飛燕諾主場防線硬淨
飛燕諾能夠喺荷甲排緊榜首，靠嘅係7場只失4球嘅堅固防線，佢哋近3場主場都冇失波，全部贏1比0或2比0，預計今場會以贏波為目標，繼續穩中求勝。

阿士東維拉開季表現大走樣，上場贏富咸先至打開聯賽勝利之門，球隊最大問題係前線唔識入波，射手奧尼屈堅斯踢到第8場先至打破入球荒，新加盟嘅查頓辛祖又幫唔到手，泰利文斯養傷進一步削弱創造力，作客飛燕諾難免要以穩陣行先，唔敢輕出搶攻。

維拉領隊艾美利係「歐霸之王」，踢呢項賽事特別醒神，首輪喺低潮期照樣以1比0擊敗博洛尼亞，穩守突擊係佢哋最擅長嘅踢法。而最近5場比賽，有4次總入球開2球或以下，今場好有可能又係1球定勝負，博中位數2.5球入球細最抵玩。