外圍賽：法國開火轟炸阿塞拜疆_東方日報

世盃外歐洲區D組，法國主場迎戰魚腩阿塞拜疆，兩隊波實力懸殊，法國擺到明拎呢場比賽嚟「磨刀」，除咗弗爆嘅基利安麥巴比領軍，桑馬迪達、艾基迪基同艾利奧捷等新前鋒都要爭取表現上位，有得數胡唔會同對手客氣，讓球主勝（-4）都冇問題。

（周六凌晨2時45分開賽）文:臻贏特

新人爭上位必搏盡
法國喺D組2戰2勝，首名出線機會好大，今場對住阿塞拜疆可以放膽搶攻，預計麥巴比將會同米高奧利斯、艾基迪基同京士利高文合組4人鋒線，首度入選嘅桑馬迪達亦想爭取機會，以法國人才濟濟嘅鋒線，相信可以全場向對手施加極大壓力，大炒冇難度。

阿塞拜疆近年偶有佳作，不過只限主場出擊，作客比賽多數輸得大大鑊，包括最近2場正式賽事作客，先喺歐國聯吞瑞典6蛋，再喺今屆分組賽首場吞冰島5蛋，今場作客火力驚人嘅法國，輸5球以上絕對唔令人意外。