沙王盃：平民球隊務實有料到 艾塔亞文客W要追_東方日報

今晚沙王盃16強激戰，卡赫利主場迎擊艾塔亞文，兩隊喺開季都有唔錯表現，聯賽成功躋身前半部份，令今場淘汰賽更有睇頭。艾塔亞文陣容平凡，但就踢出實而不華嘅高效足球，近期6連勝士氣爆燈，今場作客亦可秤高一線，捧客勝。（周一晚上10時35分開賽）文:工廠仔

沙特球隊近年大灑金錢買球星，聯賽向來由幾隊豪門所壟斷，不過「平民球隊」艾塔亞文開季意外殺出，聯賽5連勝後升上第2位，僅落後艾納斯3分，各項賽事更豪取6連勝，今夏重掌帥印嘅巴西教頭查梅斯卡功勞最大，佢令球隊踢法更具效率同侵略性，喺6連勝走勢中攻入20球，火力驚人。

主隊卡赫利射手啞火
主場出擊嘅卡赫利依家排沙職第6位，表現算係唔差，但係近況就好一般，對上5場賽事2勝1和2負，前面太過依賴挪威射手祖舒亞京治數胡，佢今季兩場冇入波比賽，卡赫利都贏唔到波，包括上個月0比1輸畀今場對手艾塔亞文，好可能會被對手重點盯死。

艾塔亞文近況好過主隊，往績亦都食住卡赫利，近6次對賽艾塔亞文錄4勝2和不敗，包括最近3次交鋒都贏晒，而佢哋近4次作客卡赫利亦有3勝1和，咁好嘅優勢當然要繼續支持。