科娜 ：列斯聯插翼屠狼

傳紅牛掟7億收購
近年徘徊喺低級聯賽嘅列斯聯最近有東山再起先兆，唔單止因為球隊嚟到季尾成績穩步上揚，再加上有傳紅牛集團有意收購列斯聯，隨時「送佢一對翼」，呢支英格蘭老牌球會有望捲土重來。近況不俗嘅列斯聯收到呢單好消息，今場喺英冠作客狼隊，有力保住不敗之地，受讓值得捧場。

（TVB 301周二凌晨零時15分直播）

列斯聯喺千禧年代初期有過一段風光日子，試過喺00至01球季殺入歐聯四強，可惜之後因財困問題逐漸沉淪，一直升唔上英超，令人唏噓。雖然列斯聯上年獲意大利商人施連奴收購，但呢個班主根本就係一個空心老倌，試過因為涉嫌逃稅搞到拖糧，但好彩球隊喺主帥李特法蘭領軍下冇交行貨，由今年1月至今贏咗好多場精彩嘅硬仗，包括作客擊敗力爭升班嘅米杜士堡、作客大勝富咸3球等，所以話今場作客狼隊唔係輸硬！

有心搞波 球員搏命
依家列斯聯仲有望易主，據英國傳媒報道，擁有F1紅牛車隊、美職球隊紐約紅牛、奧地利球隊薩爾斯堡嘅紅牛集團出價6,000萬鎊（約7億港元）全面收購列斯聯，交易好大機會成事，列斯聯多咗呢對「翼」後，隨時喺不久嘅將來「飛」上英超呀！皆因紅牛集團喺運動方面嘅投資總體嚟講都算成功，喺05年收購咗身陷財困嘅薩爾斯堡後，即作出大量嘅投資，成功令呢隊波成為國內班霸。見到未來班主咁有心搞足球，唔單止球迷放心，球員都更加有心幫球會賣命喇！

狼隊雖然近況都算唔錯，但今場就有中場主力路維因傷上陣成疑，對住狀態同樣唔差、又有利好消息刺激嘅列斯聯，想贏唔係咁易噃！