雷法爾：5福C朗嘜唔住 皇馬追打華歷簡奴

「銀河艦隊」強勢回歸！早前備受批評嘅皇馬同C朗，上仗爆Seed狂數CF格蘭納達9:1，創下今季西甲最大比分勝仗，王牌C朗五福臨門更加係震驚西甲。今晚皇馬作客華歷簡奴，主隊對親皇馬向來唔識反抗，睇怕都係拱手獻上3分，1.54倍「讓客」咪執輸。

（now632台周四凌晨4:00直播）

同為馬德里球隊，華歷簡奴一向臣服喺皇馬腳下，佢哋近12次喺西甲同「銀河艦隊」交手，次次都送上3分做禮物，上一次「作反」贏波已經係96/97球季咸豐年前嘅事。長年累月咁輸法，怕且呢班波都唔記得點還擊咁滯，就算呢排佢哋連贏3場狀態唔差，今次碰頭相信都會繼續向皇馬進貢3分。

華歷簡奴西甲交手12連敗
事實上華歷簡奴踢法進取，火力唔比其他中下游球隊遜色。但弊在班波吓吓玩鬥攻，結果失球數字長期高企。若非CF格蘭納達上仗遇上「殺人王」皇馬痛失9球，未計呢輪聯賽之前，「華歷」嘅失球數字多達51球，就連榜末嗰4隊都唔夠佢多，可想而知佢哋條豆腐防線幾得人驚，呢鋪對住殺得性起嘅皇馬仲點招架？

皇馬群星抖夠搏殺
至於啱啱玩完「大屠殺」嘅皇馬，聯賽仍然落後巴塞4分，今鋪睇怕都唔會放軟手腳。前鋒賓施馬、中場占士洛迪古斯、卻奧斯上仗提早被換離場有得抖，中場艾斯高又回歸，有助「銀河艦隊」繼續開火搶分。何況C朗只要喺今晚入多粒，就可以同球會名宿魯爾、迪史堤芬奴睇齊，列入皇馬300球名人堂，對於勁要面嘅C朗肯定加多兩錢肉緊數胡，今鋪華歷簡奴睇怕扯定白旗投降都唔得掂。

盤路解碼
皇馬近5次同華歷簡奴交手，4仗至少贏對手2粒。

Data King：C朗鬥華歷簡奴勁入波
?C朗7次聯賽鬥華歷簡奴入9球。

?「銀河艦隊」連續12次喺西甲砌低華歷簡奴。

?華歷簡奴鋒將貝爾奴近5仗入8粒。

乜都玩錦囊：士哥拿着火玩埋半場大
皇馬火力有幾猛相信唔使多講，單係回勇嘅C朗已經夠殺。不過華歷簡奴都唔執輸，前鋒貝爾奴歇冬後狀態大勇，交出10個入球兼1次助攻，近5仗亦轟入8球咁多。既然雙方嘅「士哥拿」都着晒火，一於追埋1.78倍半場大，提早半場收錢好過。