卡爾萬：「愛奴」作客曳難發「維」

阿度里斯爆Seed有仇報仇
西甲快車今晚又有直播，畢爾包喺主場對華倫西亞，讓平半值得吼實。雖然畢爾包有中場蒙尼恩重傷提早收咧，但老牌射手阿度里斯最近大爆發，今場佢倒戈出戰，有可能打爆華倫西亞後防，幫捧場客開上盤！

（now632台及TVB13周五凌晨2:00直播）

畢爾包日前作客以0:2不敵西維爾，連盃賽在內5連勝走勢結束，蒙尼恩仲喺比賽中受傷，估計至少抖半年，被迫提早收咧。之不過咁，「巴斯克雄獅」喺3月所有比賽贏晒，主帥華爾維迪更當選該月西甲最佳教頭，明顯已經走出季初要兼顧歐聯嘅低迷困局，何況34歲嘅阿度里斯踏入2015年後轉運，現時喺聯賽已攻入11球，又幫球隊殺入西班牙盃決賽，比賽信心肯定爆棚。

蒙尼恩提早收咧
記得阿度里斯喺2010至12年，曾經為華倫効力兩季，可惜大部分時間坐冷板，最後黯然離隊重返畢爾包，難得佢家陣狀態回升，今場仲唔有仇報仇咩？睇番上季作客華倫，佢都試過倒戈為畢爾包射入12碼，正所謂食過翻尋味，主場入番球梗係更開心啦！

「蝙蝠兵團」失分洩氣
對家華倫連續8場不敗，依家只得西甲一條戰線，當然想力保前4攞下屆歐聯入場券，可惜「蝙蝠兵團」從曼城借返嚟嘅箭頭尼格度近期腳風麻麻，上仗又喺主場畀維拉利爾悶和失分，球員洩氣信心受挫，對住聯賽主場3連勝嘅畢爾包，受讓平半都要唔過！

好波有得睇：直播以電視台公布為準
西甲? 畢爾包 Vs 華倫西亞 周五凌晨2:00? now632、TVB13