法達斯維：華倫搶分 吸乾畢爾包

今晚西甲快車去到尾站，其中直播戲碼係畢爾包主場惡鬥「蝙蝠兵團」華倫西亞，前者啱啱輸波被打斷連勝氣勢，相反華倫西亞挾住八場不敗勢頭，為爭取來屆歐聯入場券，絕對唔赦踢緊風流波嘅「巴斯克雄獅」，仲有得受讓平半咁筍，華倫呢個下盤咪錯過。

（now 632及TVB 13周五凌晨2時直播）

查實畢爾包近況唔錯，雖然喺歐霸三十二強遭拖連奴淘汰，但於西班牙盃殺入決賽，在三月所有比賽締造五連勝佳績，主帥華爾維迪更當選該月西甲最佳教頭，徹底走出季初要兼顧歐聯下嘅低迷困局。儘管西甲一向冇「最佳魔咒」，不過呢支「巴斯克雄獅」上仗卻淨吞西維爾兩蛋被打窒道氣。由於喺西盃決賽對手巴塞下屆參加歐聯冇乜懸念，即係話畢爾包基本上穩奪歐霸資格，對佢哋嚟講，聯賽已經成為例行公事，戰意成疑。

近8仗不敗受讓筍
「四哥」華倫西亞就唔同，自新加坡富豪林榮福入主後全面復甦，今季長期位居前列位置，之前八場六勝二和未輸過，佢哋只得聯賽一條戰線，力保前四攞下屆歐聯入場券成為唯一目標；從曼城借來嘅箭頭尼格度一直希望留喺西甲，所以一定會爭取表現博華倫買斷佢。

睇番積分榜，儘管華倫西亞只落後第三嘅馬體會四分，仍有機會爭季軍，但其實佢哋畀打多一場嘅西維爾追至同分，形勢緊湊，因此上仗遭維拉利爾悶和嘅「蝙蝠兵團」不容再失，撞正無欲無求嘅畢爾包，唔趁機搶分更待何時？華倫今場仲受讓平半，斯維力撐下盤。