美斯謙：ＦＣ悉尼踩場打殘光輝

澳職嚟到最後直路階段，一眾前列球隊為搶最佳名次入季後賽，每場波都會搏到盡。排第5嘅FC悉尼目前以3分落後今仗對手、排第2嘅珀斯光輝，今仗雖然要作客出戰，但以球隊今季客戰未輸過嘅表現，絕對有力反客為主，平手盤阿謙撐FC悉尼。

（有線64及203台周五晚上7時45分直播）

光輝近兩仗雖然贏波，但係所擊敗嘅對手只係積分榜最尾兩隊西悉尼流浪者同紐卡素噴射機，早前面對中游分子好似中岸水手同布里斯班獅吼都贏唔到，可見近兩仗贏波只係對手冇料到。光輝今仗雖有主場之利，而且只得靴斯及薩哥維治兩個長期傷兵，但球隊近6仗主場只係贏過1次，今仗要贏波絕對唔係易事。

FC悉尼上仗主場輸畀阿德萊德聯，錯失升上榜首嘅機會，但球隊仍有機會爭常規賽冠軍，所以餘下每場都會全力以赴。FC悉尼今仗續有射手史美斯停賽，一眾長期傷兵好似前鋒哥利加美路、中場艾希爾菲及後衞奧尼洛夫斯基等未好返，但前線有射手真高在陣夠殺，況且球隊今季作客未輸過兼近5場都贏晒，平手盤阿謙一定支持FC悉尼。

勝利「-1」重擊噴射機
至於另一場賽事，榜首嘅墨爾本勝利近5仗取得3勝2和狀態甚弗，今仗主場面對包尾大幡、已兩連敗且有多名球員缺陣嘅紐卡素噴射機，相信有望大勝一仗，捧讓球主勝。

（有線64及203台周五下午5時40分直播）