蘇斯黑柴：傷病攰交煎細風繞德甲

數據係足球博彩其中一個重點，莊家對歐洲各大聯賽入球數字都有評級，德甲近年一直係入球偏高聯賽，所以今晚六場賽事，當中四場都係大盤熱過細盤，不過黑柴認為目前德甲列強都受到傷病攰交煎，今晚除拜仁對法蘭克福一役預期會有大交易外，其餘五仗黑柴都撐細盤。

由08-09球季到前季，連續五季德甲大盤率都係54至56％，上季突發入球高峰期，全季306場比賽共產生967個入球，平均每場3.16個，大盤率逾61％，呢個單一賽季令莊家對德甲大細賠率評級進一步調整，大盤愈嚟愈熱，不過今季情況已經有變，經過27輪賽事，平均每場入球只有2.79個，大盤率僅51％，上輪9場比賽4大5細合共只有21個入球，平均每仗僅2.33球，有愈入愈少趨勢。

傷停名單多達60人
黑柴估計今輪入波仲會進一步下調，列強搏完大半季損耗多，根據德國權威網站《踢球者》統計，今輪因傷病同停賽缺陣嘅球員多達60人，只有弗賴堡同史特加兩隊可以夫添，而更重要係剛周中啱啱踢完四場德國盃半準決賽，當中三場要加時攰到極，下周中又有歐聯同歐霸八強戰接踵而來，賽程太密，大家將節奏拖番慢啲係人之常情！

今晚早場慕遜加柏對多蒙特（有線64及203台周六晚9時30分直播），兩隊德國盃都搏殘，加上慕遜加柏近七季主場對多蒙特全開細盤，值得再追。尾場漢堡對禾夫斯堡（有線61及64台周日凌晨零時30分直播），主隊係德甲攻力最弱球隊，已經連續四仗冇波入，禾堡剛於德國盃苦戰耗力多，下周中又有歐霸大戰後顧，呢場求慳力入波又點會多？