張志德 ：紅鑽夠力玩殘前鋒

執靚防線收納勁箭
日職今日有場大戰上演，榜首浦和紅鑽作客川崎前鋒。紅鑽開季表現唔錯，至今仍屬不敗之師，今仗射手興梠慎三有機會復出，大大增強入波本錢，造訪近況表現反覆嘅川崎前鋒有力反客為主，平手盤細鬼撐作客嘅紅鑽。

（有線61及201台周日下午4時直播）

紅鑽上季於最後一場聯賽輸波，將冠軍拱手相讓予大阪飛腳，同球隊於季尾階段防線頻頻犯錯有關。細鬼今季做過紅鑽嘅直播賽事，覺得成班波喺防守方面同上季比顯得更集中，似乎經歷上季尾嘅教訓之後，球隊銳意要做好防務工作，今季踢咗4場只係失咗1球，證明確係有所改善。

興梠慎三復出添火力
紅鑽除防守方面好咗之外，進攻方面亦有唔少變化，球隊今夏成功羅致斯洛文尼亞射手隆比真歷加盟，呢位前線球員雖然喺聯賽未開齋，但始終具威脅力令對手會有所防範，間接令其他中前場球員可以得到更多空間，對班波幫助甚大。紅鑽近期傷兵問題亦有所紓緩，主力射手興梠慎三嘅傷勢好得七七八八，大有機會喺今場復出，有力助球隊作客爭勝。

前鋒近期雖錄得兩連勝，但面對下游球隊如名古屋鯨魚、神戶勝利船及山形山神都贏唔到，令細鬼覺得佢哋嘅表現有啲反覆。前鋒射手大久保嘉人近期頻頻入波，但其他隊友表現相對就較為沉寂，加上另一射手小林悠因傷繼續缺陣，將由今季新加盟嘅前鋒杉本健勇取代，令球隊攻力有所影響，今仗未必咁容易攻破紅鑽嘅大門，平手盤細鬼始終睇好紅鑽。