走肖 ：利物浦 紐卡素 駁火做大騷

英超星期一值得捱眼瞓睇好波，利物浦今晚喺主場對紐卡素，1.65倍入球大好路！兩隊同樣有隊長停賽，防守能力大減，不過近年紅軍喺晏菲路對紐卡素特醒，「打鵲英雄」史杜列治又突然好番，大家開定電腦等入波嘅響聲啦。（now621台周二凌晨3:00直播）

史獨3鬥「喜鵲」入4球
利物浦喺聯賽兩連敗後，爭入前4名嘅機會大減，好在佢哋日前喺英總8強重賽以1:0砌低布力般流浪，假如最後捧到盃嘅話，領隊羅渣士或者唔使炒，有助挽回更衣室士氣。仲有呀，紅軍近9次主場對紐卡素有8勝1和，期間有6次開入球大，今場有大把波入都唔奇。

由於利物浦有隊長謝拉特同中堅史卡迪爾停賽，後衞馬馬度沙高傷咗，幸陣中最識入波嘅射手「史獨」史杜列治好番，簡直係及時雨！佢喺日前對布力般嘅比賽正選上陣84分鐘，睇嚟狀態都幾弗，要記住，佢加盟紅軍後3次有份出戰紐卡素都有波入，總共有4個士哥，可以話係「喜鵲剋星」！

紐卡素為護級實搏
紐卡素上星期以0:1不敵新特蘭，近況勁曳，今場仲有前鋒柏比斯施斯、隊長高洛仙尼坐波監。但唔好忘記，近期佢哋要對曼城、曼聯同阿仙奴，輸波情有可原，賽前領隊卡華仲提醒球員，依家仲未護級成功，照計佢哋唔會放軟手腳，有望駁火開入球騷。