九叔 ：柏雷素爾鹿島做慣大騷

日職今日加開快車，柏雷素爾主場迎戰鹿島鹿角，呢兩隊波今季好似坐過山車咁，威一輪衰一輪，大起大落，入得又失得，開季兩個月已經出現過其他波膽，今場唔博1.75倍大仲博乜？

（有線61及201周四晚6:00直播）

柏雷素爾、鹿島家陣只係位列中游，查實兩隊上季分別排第3同第4位，都係屬於實力分子，但係季初日職、亞冠雙線作戰，搞到佢哋有啲無所適從，尤其新人較多嘅鹿島，仲連續5場做開場白，畀班擁躉插到爆晒。好彩亞冠盃處於出局邊緣，反而令鹿島班人放鬆心情一搏，立即出現反彈，最近4場波2勝2和，更加响亞冠主場以2:1絕殺中超豪門廣州恒大，信心返晒嚟，前鋒金崎夢生、中場遠藤康愈踢愈順，今日作客都有權入波。

同樣入得又失得
柏雷素爾就剛啱調轉，季初日職、亞冠6戰不敗後，嚟個3戰不勝，上場客戰3:1打抵松本山雅先至反彈番，但呢班波今季真係好勁，季初10場入21球，仲勁過入13球嘅大阪飛腳，可以話係目前日職最攻得嘅球隊。

但係柏雷素爾有個公認嘅毛病，就係防線應付兩邊傳中波嘅能力特別差，亞冠和山東魯能4:4、日職負橫濱水手1:2兩場波，完全畀人睇到佢哋呢個弱點，今日對住埋門質素唔曳，季初9場波入到13球，效率仲高過飛腳嘅鹿島，想唔失球都難，好大機會又同對手合作開入球騷。