黃興桂：好波停不了 歎埋美職棒NBA

春回大地百花齊放，對於鍾意睇波嘅球迷嚟講，可以話係賞心樂事，好波連場實在令人應接不暇。踏入4月下旬，每日朝早同深夜都會睇到美國職業棒球賽，其實棒球先至係Peter嘅至愛，仲有喺聽日揭開戰幔嘅NBA季後賽，東西岸各8隊展開淘汰賽，一路打到6月中先會決出總冠軍誰屬，呢啲先至係戲肉嘛！老實講雖然呢16隊之中冇一隊係我愛隊，但希望好耐未嘗冠軍滋味嘅金州勇士可以捧番次盃。

紅藍大戰捧和最啱數
講番今晚英超大戰車路士火併曼聯，位列榜首嘅車仔形勢大好，袋咗半隻冠軍獎盃落袋，曼聯自主帥尹戈爾起用朗尼出任單箭頭後，愈戰愈勇，由於數字上仲有機會爭標，佢哋梗想喺史丹福橋擸晒3分，反而車仔就以「和」為貴，總之唔輸都冇壞，雙方實力半斤八両，所以呢場紅藍大戰不妨試吓1比1同2比2波膽。但記得小注怡情，費事輸咗錢，搞到冇心機去觀賞其他體育運動，咁就唔抵啦！